ໂຮງງານນໍ້າດື່ມນໍ້າຫ້າ ແມ່ນກິດຈະການໜຶ່ງຂອງກິດຈະການພູອິວ ທີ່ເຮັດກິດຈະການດ້ານການບໍລິການມາແຕ່ປີ 1997 ຢູ່ເມືອງສິງ, ແຂວງຫຼວງນໍ້າທາ ເບຶ້ອງຕົ້ນແມ່ນໄດ້ເຊົາໂຮງແຮມສິງຈະເລີນ ເພື່ອບໍລິການທີ່ພັກແຮມ, ປີ 2002 ໄດ້ເລີ່ມກໍ່ສ້າງເຮືອນພັກເປັນຂອງຕົນເອງ ເອີ້ນວ່າເຮືອນພັກພູອິວ I ປະກອບມີ 5 ຫ້ອງນອນ, ປີ 2004 ໄດ້ສ້າງເຮືອນ ພັກແບບທໍາມະຊາດເຮັດດ້ວຍໄມ້ປ່ອງຈໍານວນ 5 ຫຼັງ ເອີ້ນວ່າ ເຮືອນພັກພູອິວ II ແລະ ຕໍ່ມາໄດ້ຢຸດເຊົາບໍລິການໂຮງແຮມສິງຈະເລີນ, ປີ 2006 ໄດ້ຂະຫຍາຍເຮືອນພັກພູອິວ II ເພີ່ມອິກ 4 ຫຼັງ ແລະ ສ້າງຕັ້ງໜ່ວຍບໍລິການທ່ອງທ່ຽວພູອີວປະຈໍາເມືອງສິງ ທີ່ເຮັດບໍລິການທ່ອງທ່ຽວຍ່າງປ່າເປັນຕົ້ນຕໍ່, ຮອດປີ 2007 ໄດ້ຂະຫຍາຍອີກ 2 ຫຼັງ ລວມມີຫ້ອງນອນ ທັງໝົດ 22 ຫ້ອງນອນ. ມາຮອດປີ 2010 ໄດ້ກໍ່ສ້າງເຮືອນພັກພູອິວ III ຢູ່ແຂວງຫຼວງນໍ້າທາ ໃນເນື້ອທີ່ດິນ 7,400 ຕາແມັດ, ມີຈໍານວນ 5 ຫຼັງ, 10 ຫ້ອງນອນ ແລະ ໄດ້ເປີດບໍລິການໃນທ້າຍປີ 2012 ໃນປີດຽວກັນນີ້ ພວກເຮົາໄດ້ສ້າງຕັ້ງບໍລິສັດທ່ອງທ່ຽວພູອິວ ເພື່ອບໍລິການນັກທ່ອງທ່ຽວ ຢູ່ເຂດພາກເໜືອຂອງລາວ ເຊັ່ນ: ແຂວງບໍ່ແກ້ວ, ແຂວງຫຼວງນໍ້າທາ, ແຂວງອຸດົມໄຊ, ແຂວງຜົ້ງສາລີ ແລະ ແຂວງຫຼວງພະບາງ. ນອກນັ້ນ, ພວກເຮົາຍັງບໍລິການສວນນໍ້າ, ຮ້ານມີນິມາກ, ຮັບຝາກເວັບໄຊທ໌ ແລະ ລົງທະບຽນຊື່ເວັບໄຊທ໌.

ໂຮງງານນໍ້າດື່ມນໍ້າຫ້າ ເປັນອຸດສາຫະກໍາທີ່ທັນສະໄໝ ທີ່ພວກເຮົາໄດ້ລົງທຶນໃສ່ໃນເຂດສໍາປະທານແຫຼ່ງທ່ອງທ່ຽວສວນອຸທິຍານນໍ້າຕົກຕາດຜາເຍືອງ ໃນເນື້ອທີ່ 5.2 ເຮັກຕາ ທີ່ຕິດກັບປ່າສະຫງວນແຫ່ງຊາດນໍ້າຫ້າ ໃນມູນຄ່າ 9.6 ຕື້ກີບ ຖືວ່າເປັນໂຄງການຂະໜາດໃຫຍ່ຂອງກິດຈະການພູອິວ ເພື່ອແນ່ໃສ່ຜະລິດນໍ້າດື່ມສະອາດ ແລະ ນໍ້າດື່ມແຮ່ທາດ ຈາກທໍາມະຊາດແທ້ ສະໜອງໃຫ້ປະຊາຊົນບັນດາເຜົ່າໃນທົ່ວແຂວງຫຼວງນໍ້າທາ, ບັນດາແຂວງພາຍໃນປະເທດລາວ ແລະ ປະເທດໃກ້ຄ່ຽງໂດຍສະເພາະແມ່ນ ສ ປ ຈີນ. ເພື່ອຄວາມສະອາດ ແລະ ປອດໄພ ຕໍ່ຜູ້ບໍລິໂພກ ພວກເຮົາໄດ້ຄໍານຶ່ງເຖິງແຫຼ່ງນໍ້າ ແລະ ນໍາໃຊ້ເຕັກໂນໂລຊີກັ່ນຕອງຈາກສາກົນ ທີ່ໄດ້ຜ່ານການຮັບຮອງຈາກ ISO-9002. ມີສາຍໄຍການຜະລິດອັດຕະໂນມັດທັງລະບົບການລ້າງ, ຮ່າຍ, ອັດ, ຕິດສະຕິເກີ ແລະ ຫຸ້ມຫໍ່. ມີຊ່ຽວຊານສະເພາະໃຫ້ຄວາມໃກ້ສິດຕິດແທດ, ຜ່ານຂະບວນການກວດກາທຸກຄັ້ງ ກ່ອນນໍານໍ້າມາຜະລິດ ແລະ ກ່ອນບັນຈຸເຂົ້າຂວດນໍ້າດື່ມ.

ໂຮງງານນໍ້າດື່ມນໍ້າຫ້າ ໄດ້ຮັບອະນຸຍາດປຸກສ້າງເຄຫາສະຖານ ຕາມໃບອະນຸຍາດສະບັບເລກທີ: 1027/ຍທຂ.ມສ, ລົງວັນທີ: 06 ພະຈິກ 2014 ອອກໂດຍຫ້ອງການໂຍທາທິການ ແລະ ຂົນສົ່ງເມືອງສິງ, ໃບອະນຸຍາດດໍາເນີນກິດຈະການໂຮງງານ ສະບັບເລກທີ: 46/ອຄ.ນທ, ລົງວັນທີ: 04 ພຶດສະພາ 2015 ອອກໂດຍພະແນກອຸດສາຫະກໍາ ແລະ ການຄ້າແຂວງຫຼວງນໍ້າທາ, ໄດ້ຮັບການຢັ້ງຢືນການຈົດທະບຽນຜະລິດຕະພັນອາຫານພາຍໃນ ກອຢ/ຜນ 1038425 ຈາກກົມອາຫານ ແລະ ຢາ, ກະຊວງສາທາລະນະສຸກ ແລະ ຂຶ້ນທະບຽນວິສາຫະກິດສະບັບເລກທີ: 111/ຈທວ, ລົງວັນທີ: 07 ຕຸລາ 2015 ໂດຍພະແນກອຸດສາຫະກໍາ ແລະ ການຄ້າແຂວງຫຼວງນໍ້າທາ.